黃子華評靚女Candy夠cool 李彩華13點傻得可愛-- 東方日報 2007‧01‧19

黃子華在新片《嚦咕嚦咕對對碰》中艷褔不淺，分別與李彩華（Rain）、盧巧音（Candy）和江若琳合作，子華更開腔評論這三位不同類型的女性，直言阿Rain「傻傻哋」。 黃子華在新片《嚦咕嚦咕對對碰》中，與阿Rain、Candy和江若琳三個不同類型的女演員合作，他坦言三位女性給他完全不同的感覺。他說影片拍攝前完全不認識阿Rain，合作第一天後，二人便迅速發展了一段友情，他說：「佢為人好健談好隨和，可以乜都傾得一餐，性格有啲十三點傻傻哋咁，所以同我好投契。佢可以拍通宵戲未埋位時，求其喺街邊搵到張床都瞓得着，仲有擘大個口咁瞓，可想而知佢幾咁隨和又幾咁可愛。」至於Candy，子華直認初次見面直覺她很cool，他說：「初時見佢喺片場，都係一個人靜靜咁坐埋一邊，好少同人接觸溝通，我仲以為佢好cool啦，其實只要仔主動啲撩吓佢，就知佢其實好玩得。」 江若琳可塑性高 至於年紀輕輕的江若琳，子華表示每一秒都見到她的笑容：「佢拍戲經驗雖然唔多，但佢外表可塑性好高，成日見佢好用心睇劇本，好有心機。新演員最緊要係有上進心，佢呢方面有好高分數。」談到今次演出的難度，子華又發揮其搞笑本色說：「我同大家講過好多次，冇角色我會做唔到，唯一就係靚仔嘅角色，所以今次就係最大困難，對我嚟講係大挑戰。」要扮靚仔，子華惟有多加留意外國靚仔型男出入的姿態，好讓他從中模仿偷師，如何演繹型男本色。問到性格演員黃秋生是否遇到同一難題？子華不留情面的說：「黃秋生同我唔同，因為佢本身覺得自己好靚。」